ਰਾਮਾਇਣ’ ਨੂੰ ਹਾਈ ਕੋਰਟ ਤੋਂ ਕਾਪੀਰਾਈਟ ਸੁਰੱਖਿਆ, ਬਿਨਾਂ ਇਜਾਜ਼ਤ ਸੀਨ ਲੀਕ ਕਰਨ ’ਤੇ ਰੋਕ
ਰਣਬੀਰ ਕਪੂਰ ਦੀ ਆਉਣ ਵਾਲੀ ਫਿਲਮ ‘ਰਾਮਾਇਣ: ਭਾਗ 1’ ਨੂੰ ਬੰਬੇ ਹਾਈ ਕੋਰਟ ਨੇ ਅੰਤਰਿਮ ਕਾਪੀਰਾਈਟ ਸੁਰੱਖਿਆ ਦਿੱਤੀ ਹੈ। ਅਦਾਲਤ ਨੇ ਅਣਪਛਾਤੇ ਵਿਅਕਤੀਆਂ, ਸੰਸਥਾਵਾਂ ਅਤੇ ਡਿਜੀਟਲ ਪਲੇਟਫਾਰਮਾਂ ਨੂੰ ਬਿਨਾਂ ਇਜਾਜ਼ਤ ਫਿਲਮ ਦੀ ਰਿਕਾਰਡਿੰਗ, ਹੋਸਟਿੰਗ ਜਾਂ ਆਨਲਾਈਨ ਸਟ੍ਰੀਮਿੰਗ ਕਰਨ ਤੋਂ ਰੋਕ ਦਿੱਤਾ ਹੈ।
ਇਹ ਹੁਕਮ ਗੌਡਪਾਵਰ ਮੀਡੀਆ ਪ੍ਰਾਈਵੇਟ ਲਿਮਟਿਡ ਵੱਲੋਂ ਦਾਇਰ ਪਟੀਸ਼ਨ ’ਤੇ ਜਾਰੀ ਕੀਤਾ ਗਿਆ। ਕੰਪਨੀ ਨੇ ਫਿਲਮ ਦੀ ਸਕ੍ਰਿਪਟ, ਕਿਰਦਾਰਾਂ, ਵੀਡੀਓ ਫੁਟੇਜ, ਗੀਤਾਂ ਅਤੇ ਰਿਕਾਰਡਿੰਗਾਂ ਨੂੰ ਕਾਪੀਰਾਈਟ ਦੀ ਉਲੰਘਣਾ ਤੋਂ ਬਚਾਉਣ ਲਈ ਅਦਾਲਤ ਦਾ ਰੁਖ ਕੀਤਾ ਸੀ। ਕੰਪਨੀ ਕੋਲ ਭਾਰਤ ਅਤੇ ਵਿਦੇਸ਼ੀ ਬਾਜ਼ਾਰਾਂ ਵਿੱਚ ਫਿਲਮ ਦੇ ਕਾਪੀਰਾਈਟ ਅਤੇ ਵੰਡ ਅਧਿਕਾਰ ਹੋਣ ਦੀ ਜਾਣਕਾਰੀ ਦਿੱਤੀ ਗਈ ਹੈ।
ਅਦਾਲਤ ਦੇ ਹੁਕਮ ਨਾਲ ਫਿਲਮ ਦੇ ਪਾਈਰੇਟਿਡ ਲਿੰਕਾਂ ਅਤੇ ਮਿਰਰ ਵੈੱਬਸਾਈਟਾਂ ਖ਼ਿਲਾਫ਼ ਕਾਰਵਾਈ ਦਾ ਰਾਹ ਖੁੱਲ੍ਹ ਗਿਆ ਹੈ। ਇੰਟਰਨੈੱਟ ਸੇਵਾ ਪ੍ਰਦਾਤਾਵਾਂ ਅਤੇ ਸੋਸ਼ਲ ਮੀਡੀਆ ਪਲੇਟਫਾਰਮਾਂ ਨੂੰ ਲਿਖਤੀ ਨੋਟਿਸ ਮਿਲਣ ’ਤੇ ਗੈਰ-ਕਾਨੂੰਨੀ ਸਮੱਗਰੀ ਹਟਾਉਣ ਲਈ ਕਾਰਵਾਈ ਕਰਨੀ ਹੋਵੇਗੀ।
ਰਿਪੋਰਟ ਮੁਤਾਬਕ, ਫਿਲਮ 5 ਨਵੰਬਰ 2026 ਨੂੰ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਹੋਣੀ ਹੈ। ਇਸ ਦੀ ਐਡਵਾਂਸ ਬੁਕਿੰਗ ਤੋਂ ਹੁਣ ਤੱਕ ਲਗਭਗ 73 ਕਰੋੜ ਰੁਪਏ ਦੀ ਕਮਾਈ ਹੋਣ ਦਾ ਦਾਅਵਾ ਕੀਤਾ ਗਿਆ ਹੈ। ਫਿਲਮ ਦੀ ਰਿਲੀਜ਼ ਤੋਂ ਪਹਿਲਾਂ ਕਾਪੀਰਾਈਟ ਸੁਰੱਖਿਆ ਨੂੰ ਲੈ ਕੇ ਇਹ ਅਦਾਲਤੀ ਹੁਕਮ ਮਹੱਤਵਪੂਰਨ ਮੰਨਿਆ ਜਾ ਰਿਹਾ ਹੈ।