ਹਜ਼ਾਰਾਂ ਕਿਸਾਨਾਂ ਨੇ ਘੇਰਿਆ ਡੀਸੀ ਦਫਤਰ; ਪੁਲੀਸ ਤੇ ਕਿਸਾਨਾਂ ਵਿਚਾਲੇ ਖਿੱਚ-ਧੂਹ

ਸੰਗਰੂਰ ਡੀਸੀ ਦਫਤਰ ਦੇ ਬਾਹਰ ਕਿਸਾਨਾਂ ਤੇ ਪੁਲੀਸ ਵਿਚਾਲੇ ਖਿੱਚ-ਧੂਹ ਦੀਆਂ ਤਸਵੀਰਾਂ।

ਭਾਰਤੀ ਕਿਸਾਨ ਯੂਨੀਅਨ ਏਕਤਾ (ਉਗਰਾਹਾਂ) ਦੀ ਅਗਵਾਈ ਹੇਠ ਹਜ਼ਾਰਾਂ ਕਿਸਾਨਾਂ ਵੱਲੋਂ ਅੱਜ ਡੀ.ਸੀ. ਦਫ਼ਤਰ ਦਾ ਘਿਰਾਓ ਕੀਤਾ ਗਿਆ। ਘਿਰਾਓ ਦੌਰਾਨ ਡੀ.ਸੀ. ਦਫ਼ਤਰ ਦੇ ਬਾਜ਼ਾਰ ਵਾਲੇ ਗੇਟ ’ਤੇ ਕਿਸਾਨਾਂ ਦੀ ਪੁਲੀਸ ਨਾਲ ਖਿੱਚ-ਧੂਹ ਵੀ ਹੋਈ, ਪਰ ਮਾਮਲਾ ਸ਼ਾਂਤ ਹੋ ਗਿਆ।

ਘਿਰਾਓ ਤੋਂ ਪਹਿਲਾਂ ਯੂਨੀਅਨ ਆਗੂਆਂ ਵੱਲੋਂ ਸਮੁੱਚੇ ਜ਼ਿਲ੍ਹਾ ਪ੍ਰਬੰਧਕੀ ਕੰਪਲੈਕਸ ਅੰਦਰ ਅਨਾਊਂਸਮੈਂਟ ਕੀਤੀ ਗਈ ਕਿ 11 ਵਜੇ ਪੱਕੇ ਤੌਰ ’ਤੇ ਡੀ.ਸੀ. ਕੰਪਲੈਕਸ ਦੇ ਤਿੰਨੋਂ ਗੇਟ ਅਤੇ ਚੋਰ-ਮੋਰੀ ਨੂੰ ਬੰਦ ਕਰ ਦਿੱਤਾ ਜਾਵੇਗਾ। ਜੇਕਰ ਕਿਸੇ ਅਧਿਕਾਰੀ, ਮੁਲਾਜ਼ਮ ਜਾਂ ਆਮ ਲੋਕਾਂ ਨੇ ਆਪੋ-ਆਪਣੀਆਂ ਗੱਡੀਆਂ ਬਾਹਰ ਕੱਢਣੀਆਂ ਹਨ ਜਾਂ ਖ਼ੁਦ ਬਾਹਰ ਜਾਣ ਚਾਹੁੰਦੇ ਹਨ ਤਾਂ ਉਹ ਚਲੇ ਜਾਣ, ਉਸ ਤੋਂ ਬਾਅਦ 24 ਘੰਟੇ ਕਿਸੇ ਨੂੰ ਵੀ ਬਾਹਰ ਨਹੀਂ ਨਿਕਲਣ ਦਿੱਤਾ ਜਾਵੇਗਾ।

ਇਹ ਅਨਾਊਂਸਮੈਂਟ ਸੁਣਦਿਆਂ ਹੀ ਬਹੁਗਿਣਤੀ ਮੁਲਾਜ਼ਮਾਂ ਨੇ ਆਪਣੀਆਂ ਗੱਡੀਆਂ ਕੰਪਲੈਕਸ ਤੋਂ ਬਾਹਰ ਕੱਢ ਲਈਆਂ ਅਤੇ ਬਹੁਤੇ ਪ੍ਰਸ਼ਾਸਨਿਕ ਅਧਿਕਾਰੀ ਬਹਾਨੇ ਨਾਲ ਕੰਪਲੈਕਸ ਵਿੱਚੋਂ ਖਿਸਕ ਗਏ, ਜਿਸ ਕਾਰਨ ਜ਼ਿਲ੍ਹਾ ਪ੍ਰਬੰਧਕੀ ਕੰਪਲੈਕਸ ਵਿੱਚ ਸੁੰਨਸਾਨ ਪਸਰ ਗਈ।

ਦਰਅਸਲ, ਪਿਛਲੇ ਮਹੀਨੇ ਜਦੋਂ ਕਿਸਾਨਾਂ ਨੇ ਪੱਕਾ ਮੋਰਚਾ ਲਗਾਇਆ ਸੀ, ਤਾਂ ਡਿਪਟੀ ਕਮਿਸ਼ਨਰ ਵੱਲੋਂ ਯੂਨੀਅਨ ਆਗੂਆਂ ਨਾਲ ਮੀਟਿੰਗ ਕੀਤੀ ਗਈ ਸੀ। ਮੀਟਿੰਗ ਦੌਰਾਨ ਕਿਸਾਨਾਂ ਨੇ ਮੰਗ ਕੀਤੀ ਸੀ ਕਿ ਡੀ.ਸੀ. ਮੈਡਮ ਸਟੇਜ ’ਤੇ ਆ ਕੇ ਮੰਗਾਂ ਦੇ ਹੱਲ ਦਾ ਭਰੋਸਾ ਦੇਣ, ਪਰ ਡੀ.ਸੀ. ਮੈਡਮ ਨਹੀਂ ਪੁੱਜੇ। ਕਿਸਾਨਾਂ ਨੇ ਡੀ.ਸੀ. ਕੰਪਲੈਕਸ ਦੇ ਗੇਟਾਂ ਦਾ ਘਿਰਾਓ ਕਰ ਲਿਆ ਅਤੇ ਕਿਸੇ ਨੂੰ ਵੀ ਬਾਹਰ ਨਹੀਂ ਨਿਕਲਣ ਦਿੱਤਾ, ਜਿਸ ਕਾਰਨ ਡਿਪਟੀ ਕਮਿਸ਼ਨਰ ਵੀ ਅੰਦਰ ਹੀ ਘਿਰ ਗਏ ਸਨ। ਕਿਸਾਨ ਘਿਰਾਓ ਕਰਕੇ ਸਾਰੇ ਗੇਟਾਂ ਅੱਗੇ ਡਟੇ ਰਹੇ, ਪਰ ਡਿਪਟੀ ਕਮਿਸ਼ਨਰ ਪੂਨਮਦੀਪ ਕੌਰ ਚਕਮਾ ਦੇ ਕੇ ਇੱਕ ਚੋਰ-ਮੋਰੀ ਰਾਹੀਂ ਪੈਦਲ ਬਾਹਰ ਨਿਕਲ ਗਏ। ਇਸ ਕਾਰਨ ਕਿਸਾਨ ਬੇਹੱਦ ਖ਼ਫ਼ਾ ਸਨ ਅਤੇ ਅੱਜ ਪੱਕਾ ਘਿਰਾਓ ਕਰਕੇ ਤਿੰਨੋਂ ਗੇਟਾਂ ਅਤੇ ਚੋਰ-ਮੋਰੀ ਅੱਗੇ ਡਟ ਗਏ।

ਹਾਲਾਤ ਨੂੰ ਭਾਂਪਦਿਆਂ ਬਹੁਤੇ ਅਧਿਕਾਰੀ ਆਪਣੇ ਦਫ਼ਤਰਾਂ ਤੋਂ ਚਲੇ ਗਏ। ਦਫ਼ਤਰ ਵਿੱਚ ਡਿਪਟੀ ਕਮਿਸ਼ਨਰ ਵੀ ਮੌਜੂਦ ਨਜ਼ਰ ਨਹੀਂ ਆਏ ਅਤੇ ਕਿਸਾਨ ਆਪਣੇ ਪੱਕੇ ਮੋਰਚੇ ’ਤੇ ਡਟ ਗਏ।