ਪਹਿਲੇ ਵੀਕਐਂਡ ‘ਚ ਹੀ ਫਿਲਮ ‘ਰਾਮਾਇਣ’ ਨੇ ਤੋੜੇ ਕਮਾਈ ਦੇ ਰਿਕਾਰਡ
ਮੁੰਬਈ: ਰਣਬੀਰ ਕਪੂਰ, ਸਾਈ ਪੱਲਵੀ ਅਤੇ ਯਸ਼ ਦੀ ਅਦਾਕਾਰੀ ਵਾਲੀ ਫਿਲਮ ‘ਰਾਮਾਇਣ’ ਨੇ ਆਪਣੇ ਪਹਿਲੇ ਵੀਕਐਂਡ ਵਿੱਚ ਹੀ ਗਲੋਬਲ ਬਾਕਸ ਆਫਿਸ ‘ਤੇ 300 ਕਰੋੜ ਰੁਪਏ ਤੋਂ ਵੱਧ ਦੀ ਕਮਾਈ ਕਰ ਲਈ ਹੈ।
ਇਹ ਫਿਲਮ 5 ਨਵੰਬਰ ਨੂੰ ਹਿੰਦੀ, ਤਮਿਲ, ਤੇਲਗੂ, ਕੰਨੜ ਅਤੇ ਮਲਿਆਲਮ ਭਾਸ਼ਾਵਾਂ ਵਿੱਚ ਸਿਨੇਮਾਘਰਾਂ ਵਿੱਚ ਰਿਲੀਜ਼ ਹੋਈ ਸੀ। ਫਿਲਮ ਵਿੱਚ ਰਣਬੀਰ ਕਪੂਰ ਭਗਵਾਨ ਰਾਮ, ਸਾਈ ਪੱਲਵੀ ਮਾਤਾ ਸੀਤਾ ਅਤੇ ਯਸ਼ ਰਾਵਣ ਦੀ ਭੂਮਿਕਾ ਵਿੱਚ ਨਜ਼ਰ ਆ ਰਹੇ ਹਨ।
ਪ੍ਰਾਚੀਨ ਮਹਾਂਕਾਵਿ ‘ਰਾਮਾਇਣ’ ‘ਤੇ ਆਧਾਰਿਤ ਦੋ ਭਾਗਾਂ ਵਾਲੀ ਫਿਲਮ ਸੀਰੀਜ਼ ਦਾ ਇਹ ਪਹਿਲਾ ਹਿੱਸਾ ਹੈ। ਟ੍ਰੇਡ ਟ੍ਰੈਕਿੰਗ ਵੈੱਬਸਾਈਟ ‘ਸੈਕਨਿਲਕ’ ਅਨੁਸਾਰ, ਫਿਲਮ ਨੇ ਦੁਨੀਆ ਭਰ ਦੇ ਬਾਕਸ ਆਫਿਸ ‘ਤੇ 375.50 ਕਰੋੜ ਰੁਪਏ ਦੀ ਕਮਾਈ ਕੀਤੀ ਹੈ। ਉੱਥੇ ਹੀ ਘਰੇਲੂ ਬਾਕਸ ਆਫਿਸ ‘ਤੇ ਫਿਲਮ ਦਾ ਕੁੱਲ ਕਲੈਕਸ਼ਨ 218.25 ਕਰੋੜ ਰੁਪਏ ਰਿਹਾ ਹੈ।
ਫਿਲਮ ਦੀ ਕਹਾਣੀ ਭਗਵਾਨ ਰਾਮ ਦੇ ਜੀਵਨ ਸਫ਼ਰ, ਉਨ੍ਹਾਂ ਦੇ ਬਨਵਾਸ, ਰਾਵਣ ਵੱਲੋਂ ਮਾਤਾ ਸੀਤਾ ਦੇ ਹਰਣ ਅਤੇ ਇਸ ਤੋਂ ਬਾਅਦ ਬੁਰਾਈ ਤੇ ਚੰਗਿਆਈ ਦੀਆਂ ਤਾਕਤਾਂ ਵਿਚਕਾਰ ਹੋਏ ਯੁੱਧ ‘ਤੇ ਆਧਾਰਿਤ ਹੈ।
ਫਿਲਮ ਦਾ ਸੰਗੀਤ ਆਸਕਰ ਜੇਤੂ ਸੰਗੀਤਕਾਰ ਹੰਸ ਜ਼ਿਮਰ ਅਤੇ ਏ.ਆਰ. ਰਹਿਮਾਨ ਨੇ ਤਿਆਰ ਕੀਤਾ ਹੈ, ਜਦਕਿ ਟੈਰੀ ਨੋਟਰੀ ਅਤੇ ਗਾਈ ਨੌਰਿਸ ਇਸ ਦੀ ਐਕਸ਼ਨ ਟੀਮ ਦਾ ਹਿੱਸਾ ਹਨ।
ਇਸ ਫਿਲਮ ਦਾ ਨਿਰਮਾਣ ਨਮਿਤ ਮਲਹੋਤਰਾ ਦੇ ‘ਪ੍ਰਾਈਮ ਫੋਕਸ ਸਟੂਡੀਓਜ਼’ ਨੇ ਅਤੇ ਯਸ਼ ਦੀ ਕੰਪਨੀ ‘ਮੌਨਸਟਰ ਮਾਈਂਡ ਕ੍ਰੀਏਸ਼ਨਜ਼’ ਨਾਲ ਮਿਲ ਕੇ ਕੀਤਾ ਹੈ।
ਫਿਲਮ ਦੀ ਬਾਕੀ ਸਟਾਰ ਕਾਸਟ ਵਿੱਚ ਸੰਨੀ ਦਿਓਲ, ਅਨੁਪਮ ਖੇਰ, ਕਾਜਲ ਅਗਰਵਾਲ, ਰਕੁਲ ਪ੍ਰੀਤ ਸਿੰਘ, ਵਿਵੇਕ ਓਬਰਾਏ, ਆਦਿਨਾਥ ਕੋਠਾਰੇ, ਅਰੁਣ ਗੋਵਿਲ, ਕੁਨਾਲ ਕਪੂਰ, ਇੰਦਰਾ ਕ੍ਰਿਸ਼ਨਨ ਅਤੇ ਲਾਰਾ ਦੱਤਾ ਵਰਗੇ ਕਲਾਕਾਰ ਸ਼ਾਮਲ ਹਨ।