ਸਿਰਫ਼ 70 ਰਨ ‘ਤੇ ਡਿੱਗੀਆਂ 5 ਵਿਕਟਾਂ, ਫਿਰ ਤਿਲਕ ਵਰਮਾ ਨੇ ਪਲਟਿਆ ਮੈਚ; ਟੀਮ ਇੰਡੀਆ ਨੂੰ ਦਿਵਾਈ ਰੋਮਾਂਚਕ ਜਿੱਤ

ਨਿਊਜ਼ੀਲੈਂਡ ਖ਼ਿਲਾਫ਼ ਦੂਜੇ ਟੀ-20 ਵਿੱਚ 70 ਦੌੜਾਂ 'ਤੇ 5 ਵਿਕਟਾਂ ਗੁਆਉਣ ਮਗਰੋਂ ਉਪ-ਕਪਤਾਨ ਤਿਲਕ ਵਰਮਾ ਦੀ ਅਜੇਤੂ ਅਰਧ ਸੈਂਕੜੇ ਵਾਲੀ ਪਾਰੀ ਦੇ ਦਮ 'ਤੇ ਭਾਰਤ ਨੇ 181 ਦੌੜਾਂ ਦਾ ਟੀਚਾ ਸਰ ਕਰ ਲਿਆ। ਟੀਮ ਇੰਡੀਆ ਨੇ 4 ਵਿਕਟਾਂ ਨਾਲ ਜਿੱਤ ਦਰਜ ਕਰਕੇ ਸੀਰੀਜ਼ ਵਿੱਚ 2-0 ਦੀ ਬੜ੍ਹਤ ਬਣਾਈ।

ਭਾਰਤੀ ਕ੍ਰਿਕਟ ਟੀਮ ਨੇ ਨਿਊਜ਼ੀਲੈਂਡ ਦੌਰੇ ਦੌਰਾਨ ਆਪਣਾ ਸ਼ਾਨਦਾਰ ਪ੍ਰਦਰਸ਼ਨ ਜਾਰੀ ਰੱਖਦਿਆਂ ਟੀ-20 ਲੜੀ ਦੇ ਦੂਜੇ ਮੁਕਾਬਲੇ ਵਿੱਚ ਵੀ ਜ਼ਬਰਦਸਤ ਜਿੱਤ ਦਰਜ ਕੀਤੀ ਹੈ। ਕ੍ਰਾਈਸਟਚਰਚ ਦੇ ਹੇਗਲੇ ਓਵਲ ਮੈਦਾਨ ‘ਤੇ ਖੇਡੇ ਗਏ ਪਹਿਲੇ ਮੈਚ ਵਿੱਚ 226 ਦੌੜਾਂ ਦਾ ਵੱਡਾ ਟੀਚਾ ਆਸਾਨੀ ਨਾਲ ਹਾਸਲ ਕਰਨ ਵਾਲੀ ਟੀਮ ਇੰਡੀਆ ਨੇ ਦੂਜੇ ਟੀ-20 ਮੈਚ ਦੌਰਾਨ ਬੇਹੱਦ ਨਾਜ਼ੁਕ ਅਤੇ ਚੁਣੌਤੀਪੂਰਨ ਹਾਲਾਤ ਦੇ ਬਾਵਜੂਦ 181 ਦੌੜਾਂ ਦਾ ਟੀਚਾ ਸਰ ਕਰ ਲਿਆ। ਇੱਕ ਸਮੇਂ ਸਿਰਫ਼ 70 ਦੌੜਾਂ ‘ਤੇ 5 ਪ੍ਰਮੁੱਖ ਵਿਕਟਾਂ ਗੁਆਉਣ ਦੇ ਬਾਵਜੂਦ ਉਪ-ਕਪਤਾਨ ਤਿਲਕ ਵਰਮਾ ਦੀ ਸੂਝ-ਬੂਝ ਭਰੀ ਅਰਧ ਸੈਂਕੜੇ ਵਾਲੀ ਪਾਰੀ ਦੇ ਦਮ ‘ਤੇ ਭਾਰਤ ਨੇ ਆਖ਼ਰੀ ਓਵਰ ਦੀਆਂ 5 ਗੇਂਦਾਂ ਵਿੱਚ ਟੀਚਾ ਹਾਸਲ ਕਰਕੇ 4 ਵਿਕਟਾਂ ਨਾਲ ਯਾਦਗਾਰੀ ਜਿੱਤ ਹਾਸਲ ਕੀਤੀ ਅਤੇ ਲੜੀ ਵਿੱਚ 2-0 ਦੀ ਅਜੇਤੂ ਬੜ੍ਹਤ ਬਣਾ ਲਈ।

ਹੇਗਲੇ ਓਵਲ ਮੈਦਾਨ ‘ਤੇ ਇੱਕ ਵਾਰ ਫਿਰ ਭਾਰਤੀ ਕਪਤਾਨ ਵੱਲੋਂ ਟਾਸ ਜਿੱਤ ਕੇ ਗੇਂਦਬਾਜ਼ੀ ਚੁਣੇ ਜਾਣ ਤੋਂ ਬਾਅਦ ਕੀਵੀ ਟੀਮ ਨੂੰ ਪਹਿਲਾਂ ਬੱਲੇਬਾਜ਼ੀ ਲਈ ਮੈਦਾਨ ‘ਚ ਉਤਰਨਾ ਪਿਆ। ਪਹਿਲੇ ਮੈਚ ਦੇ ਮੁਕਾਬਲੇ ਇਸ ਵਾਰ ਪਿੱਚ ਦਾ ਮਿਜ਼ਾਜ ਵੱਖਰਾ ਸੀ, ਜਿਸ ਦਾ ਅਸਰ ਸ਼ੁਰੂਆਤ ਵਿੱਚ ਹੀ ਸਾਫ਼ ਨਜ਼ਰ ਆਇਆ। ਪਾਵਰਪਲੇਅ ਦੌਰਾਨ ਨਿਊਜ਼ੀਲੈਂਡ ਦੀ ਟੀਮ ਨੇ ਸਿਰਫ਼ 41 ਦੌੜਾਂ ਦੇ ਅੰਦਰ ਹੀ ਆਪਣੇ ਚੋਟੀ ਦੇ 3 ਅਹਿਮ ਬੱਲੇਬਾਜ਼ ਗੁਆ ਦਿੱਤੇ। ਅਜਿਹੇ ਸੰਕਟ ਦੇ ਸਮੇਂ ਗਲੇਨ ਫ਼ਿਲਿਪਸ ਅਤੇ ਬੇਵਨ ਜੈਕਬਸ ਨੇ ਪਾਰੀ ਨੂੰ ਸੰਭਾਲਿਆ ਅਤੇ ਚੌਥੀ ਵਿਕਟ ਲਈ 116 ਦੌੜਾਂ ਦੀ ਮਜ਼ਬੂਤ ਸਾਂਝੇਦਾਰੀ ਕਰਕੇ ਟੀਮ ਨੂੰ ਮੁਸ਼ਕਲ ਵਿੱਚੋਂ ਬਾਹਰ ਕੱਢਿਆ।

ਫ਼ਿਲਿਪਸ ਨੇ ਸ਼ਾਨਦਾਰ ਫ਼ਾਰਮ ਜਾਰੀ ਰੱਖਦਿਆਂ ਲੜੀ ਦਾ ਲਗਾਤਾਰ ਦੂਜਾ ਅਰਧ ਸੈਂਕੜਾ ਜੜਿਆ ਅਤੇ ਸਭ ਤੋਂ ਵੱਧ 70 ਦੌੜਾਂ ਦੀ ਪਾਰੀ ਖੇਡੀ, ਜਦਕਿ ਦੂਜੇ ਪਾਸੇ ਜੈਕਬਸ ਨੇ ਵੀ ਆਪਣਾ ਅਰਧ ਸੈਂਕੜਾ ਪੂਰਾ ਕੀਤਾ। ਆਖ਼ਰੀ ਪਲਾਂ ਵਿੱਚ ਮਾਈਕਲ ਬ੍ਰੇਸਵੈੱਲ ਨੇ ਸਿਰਫ਼ 2 ਗੇਂਦਾਂ ਵਿੱਚ ਇੱਕ ਛੱਕਾ ਅਤੇ ਇੱਕ ਚੌਕਾ ਲਗਾ ਕੇ ਨਿਊਜ਼ੀਲੈਂਡ ਦੇ ਸਕੋਰ ਨੂੰ ਨਿਰਧਾਰਤ 20 ਓਵਰਾਂ ਵਿੱਚ 180 ਦੌੜਾਂ ਤੱਕ ਪਹੁੰਚਾਇਆ। ਭਾਰਤ ਵੱਲੋਂ ਤੇਜ਼ ਗੇਂਦਬਾਜ਼ ਅਰਸ਼ਦੀਪ ਸਿੰਘ ਸਭ ਤੋਂ ਕਾਮਯਾਬ ਰਹੇ, ਜਿਨ੍ਹਾਂ ਨੇ ਆਪਣੇ 4 ਓਵਰਾਂ ਦੇ ਕੋਟੇ ਵਿੱਚ 33 ਦੌੜਾਂ ਦੇ ਕੇ 2 ਅਹਿਮ ਵਿਕਟਾਂ ਹਾਸਲ ਕੀਤੀਆਂ।

181 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਨ ਉਤਰੀ ਭਾਰਤੀ ਟੀਮ ਦੀ ਸ਼ੁਰੂਆਤ ਕੁਝ ਮੱਠੀ ਰਹੀ, ਪਰ ਜਲਦ ਹੀ ਸੰਜੂ ਸੈਮਸਨ ਅਤੇ ਅਭਿਸ਼ੇਕ ਸ਼ਰਮਾ ਨੇ ਦੌੜਾਂ ਦੀ ਰਫ਼ਤਾਰ ਤੇਜ਼ ਕੀਤੀ। ਹਾਲਾਂਕਿ ਪੰਜਵੇਂ ਓਵਰ ਵਿੱਚ ਸੰਜੂ ਸੈਮਸਨ ਦੇ ਆਊਟ ਹੋਣ ਮਗਰੋਂ ਭਾਰਤੀ ਬੱਲੇਬਾਜ਼ੀ ਲੜਖੜਾ ਗਈ। ਯੁਵਾ ਬੱਲੇਬਾਜ਼ ਵੈਭਵ ਸੂਰਿਆਵੰਸ਼ੀ ਵੱਡੀ ਪਾਰੀ ਖੇਡਣ ਵਿੱਚ ਨਾਕਾਮ ਰਹੇ, ਜਦਕਿ ਕਪਤਾਨ ਸ਼੍ਰੇਅਸ ਅਈਅਰ ਵੀ ਸਸਤੇ ਵਿੱਚ ਪੈਵੇਲੀਅਨ ਪਰਤ ਗਏ। ਨਿਊਜ਼ੀਲੈਂਡ ਦੇ ਕਪਤਾਨ ਮਿਸ਼ੇਲ ਸੈਂਟਨਰ ਨੇ ਸ਼ਾਨਦਾਰ ਸਪਿਨ ਗੇਂਦਬਾਜ਼ੀ ਕਰਦਿਆਂ 3 ਵੱਡੇ ਝਟਕੇ ਦਿੱਤੇ, ਜਿਸ ਕਾਰਨ ਭਾਰਤ ਦਾ ਸਕੋਰ 70 ਦੌੜਾਂ ‘ਤੇ 5 ਵਿਕਟਾਂ ਹੋ ਗਿਆ ਅਤੇ ਟੀਮ ਡੂੰਘੇ ਸੰਕਟ ਵਿੱਚ ਘਿਰ ਗਈ।

ਮੁਸ਼ਕਲ ਘੜੀ ਵਿੱਚ ਨਮਨ ਧੀਰ ਨੇ ਮੈਦਾਨ ‘ਤੇ ਉਤਰਦਿਆਂ ਹੀ ਹਮਲਾਵਰ ਅੰਦਾਜ਼ ਅਪਣਾਇਆ ਅਤੇ ਤੇਜ਼-ਤਰਾਰ ਸ਼ਾਟ ਲਗਾ ਕੇ ਭਾਰਤ ਦੀ ਮੈਚ ਵਿੱਚ ਵਾਪਸੀ ਕਰਵਾਈ। ਹਾਲਾਂਕਿ ਸੈਂਟਨਰ ਨੇ ਨਮਨ ਨੂੰ ਵੀ ਆਊਟ ਕਰਕੇ ਇਹ ਖ਼ਤਰਨਾਕ ਭਾਈਵਾਲੀ ਤੋੜ ਦਿੱਤੀ। 15ਵੇਂ ਓਵਰ ਵਿੱਚ ਜਦੋਂ ਨਮਨ 112 ਦੇ ਸਕੋਰ ‘ਤੇ ਆਊਟ ਹੋਏ ਤਾਂ ਉਪ-ਕਪਤਾਨ ਤਿਲਕ ਵਰਮਾ ਨੇ ਨਿਤੀਸ਼ ਕੁਮਾਰ ਰੈੱਡੀ ਨਾਲ ਮਿਲ ਕੇ ਮੋਰਚਾ ਸੰਭਾਲਿਆ। ਦੋਵਾਂ ਬੱਲੇਬਾਜ਼ਾਂ ਨੇ ਵਿਕਟਾਂ ਦੇ ਪਤਨ ਨੂੰ ਰੋਕਦਿਆਂ ਸਟ੍ਰਾਈਕ ਰੋਟੇਟ ਕੀਤੀ ਅਤੇ ਟੀਮ ਨੂੰ ਟੀਚੇ ਦੇ ਬਿਲਕੁਲ ਨੇੜੇ ਪਹੁੰਚਾ ਦਿੱਤਾ।

ਆਖ਼ਰੀ ਓਵਰ ਵਿੱਚ ਟੀਮ ਇੰਡੀਆ ਨੂੰ ਜਿੱਤ ਲਈ 11 ਦੌੜਾਂ ਦੀ ਲੋੜ ਸੀ। ਤਿਲਕ ਵਰਮਾ ਅਤੇ ਨੀਤੀਸ਼ ਕੁਮਾਰ ਰੈੱਡੀ ਨੇ ਦਬਾਅ ਹੇਠ ਸ਼ਾਨਦਾਰ ਸੰਜਮ ਦਿਖਾਇਆ ਅਤੇ 5 ਗੇਂਦਾਂ ਦੇ ਅੰਦਰ ਹੀ ਲੋੜੀਂਦੀਆਂ 11 ਦੌੜਾਂ ਬਣਾ ਕੇ 1 ਗੇਂਦ ਬਾਕੀ ਰਹਿੰਦਿਆਂ ਭਾਰਤ ਨੂੰ 4 ਵਿਕਟਾਂ ਨਾਲ ਸ਼ਾਨਦਾਰ ਜਿੱਤ ਦਿਵਾ ਦਿੱਤੀ।